Ani Jakova e organizacia Roma in Action adikergya truyali mez e tema “Pozicia e ternengi ko sasutnipe e ulavde fokuseya ko terne e romane, ashkalyune thay egipqanyune komunitetengo sar vi mekanizmya kay garavena thay garantinena o ternenge hakaya”.

Ano rami e Lumiake Divesko vash o Terne kova hramingyola pe 12 avgusti adikerdili diskutipeski mesalin kote adikerdili puterdi debata vash pozicia thay darakeripya e ternenge e ulavde vakeripeya ko terne e romane, ashkalyune thay egipqanyune komunitetengo. Pashe e reprezentyenge kotar lokaluno thay centraluno niveli prezentune sine vi dizune thay jene kotar biraipkane organizacie. Emrah Cermnjani kotar e organziaci Roma in Action vakergya kay prekal akala aktivitetya si pe resipe te vazdingyol o avazo e ternengo thay biphanglo e anglipyenge o sfide thay diskriminipe ko terne akale komunitetengo lungyarena te oven prezentune.

“Ji ij amen na sinemen avazo e ternengo ko lokalune institucie, akana shay te phena kay egzistinla akava avazo thay terne akale komunitetengo, olenge mangipya siton planirime ano lokalune akciake planya, thay dikha kay olengi pozicia dive palo dive laqhargyola numay dikha kay manglape pandar te kergyol buti vash olengo zorakeripe, butyaripe thay shaipe vash deipe e yekhune akcesesko vash profesionalune janipya ani Jakovaki komuna”, vakerla o Cermnjani.

Ji kay kotar reprezentya e centralune nivelesko vakerdilo kay o jene e romane, ashkalyune thay egipqanyune komunitetengo mothavde peste buti ver kay shay te oven suksesune ano decisiake leipeske pozicie, vakerla o Sejnur Veshal, Taloministri vash Kultura, Terne thay Sporti.

“Ano akava paneli amare kotorleipeya, moro thay e deputetesko mothavgyem yekh storia e sukseseski. Mothavgyem ini e buderune komuniteteske kay jene e komunitetengo shay te oven deputetya e Kosovaka Republikako thay talominsitrya e Kosovaka Republikako vay minsitrya e Kosovaka Republikako e na ministrya vay talominsitrya vay deputetya kola avena kotar o komuniteti thay ka keren buti vash o komuniteti.

Ji kay Agon Batusha, deputeti ano kosovako sombeshipe phenela kay bazirimo pe studie kay kerdile ano akava segmenti kotar o bersh 2013 ani sah kosova si peripe e angazhipesko e ternengo ano procesya e decisiake leipesko.

“Bibahtake sar si pe but rodlaripya o terne siton but hari kotorleutne ano decisiako leipe. Reslilo yekh kulmi ji pe 2013 vash sebepi e siklovnenge konsilengo, palo odova si peripe vash sebepi kay komunake direktoriatya na dikhlarena o konsilya e siklovnenge kola musay te oven sherune e siklovnenge numay na sherune kay sile mangipe o direktori, numay sheruno kay reprezentinela qaqipeya e siklovne, akava sito demorkacia ani shkola”, vakegya o Batusha.

Yaver tema e disktuipeski sine vi nanipe yekh publikune centrosko e ternengo ani jakova kote kotar 28 centrya kay arakhlona ani kosova numay 2 sitoy aktivune. Vash akava puqipe e Saranda Hyseni Maloku diektora vash kultura, terne thay sporti ani Jakovaki komuna vakergya kay si dosta obyektya e jakovakaka komunako kote shay te oven tromale thay shay olendar yekh te vastingyol vash ternenge aktivitetya pe avipe.

Kotar akava diskutipe apelisalo kay o terne ma te hezitinen kay te angazhingyon ano ververutne proyektya kola pherena olengo edukipesko profili.

@ROMTEGRA