EDUKIPE

Sfide e haricune komunitetengo vash registripe ano shkole

  • 4 months ago
  • By Romtegra

O registripe e romane, ashkalyune thay egipqanyune qhavorengo ani angluni klasa aqhola te ovel sfida vash akala komunitetya. Ayekha pharipya pandar lungyargyona vi ko akava bersh ani Jakovaki komuna vash o shkolako bersh 2021/2022. Pranvera Kershi sevalutni vash koordinipe e komunitetenge hakayengo thay integripe mothavela kola siton o sebepya kay anena o dosna aqhipe e qhavorenge registripesko ano shkole.

“Problemya si ververutne, may buderi o dadalarya dayk ver siton neglizhentya thay na nakhena te registrinen vahteya e qhavoren. Thay sheruno problemi si o naregistripe pe vahti e qhavorengo thay vash akava sebepi amen kera kampanye vash te vazda o godinipe e dadalaryengo kay te registringyon pe vahti. Sito problemi ini o than kote jivdinena, soske e mahala kote jivdinena thay kote si may buderi komunitetenge siklovne registringyona ani shkola Mustafa Bakia thay shkola Emin Duraku”, mothavela e sevalutni Kershi.

Direktorya e fundone shkolengo kote gravitinena o siklovne e haricune komunitetengo phenena kay o gendo e siklovnengo kotar o komunitetya kay registringyona ani shkola sakova bersh bayrola may buderi. Zana Kurtishi Rudi, direktora e fundona shkolako “Mustafa Bakia” mothavela vash o procesi thay sfide.

“Romane, Ashkalyune thay Egipqnayune komunitetya ini kay phikoningyona kotar sah komuniteti ani Jakova shrdindoy kotar biraipkane organizacie, ofisi vash komunitetya, shkole pandar silen pharipya. Odola siton may buderi ano dokumentya, sar si ekstrakti e bianipesko, numay dayk ver ini dadalaryengi neglizhencar ovela. Amen kera kharipe, nakha ano mahale, siton vi ververutne biraipkane organizacie kola azhutinena amen kay te vazda o godinipe thay te kera godinipesko vazdipe vash te registringyon ani angluni klasa”, phenela e Rudi.

Ji kay o Smajl Haziri, talo direktori e fundona shkolako “Emin Duraku” mothavela sar ovela o registripesko procesi.

“Minoritetya siton astarne sar o sah yaver komunitetya ano registripe. Ji akana siton registrime 37 siklovne, 7 olendar minoritetya, ji kay yekh organizacia koya lelape e registripeya e minoritetengo angya pandar 22 roma, ashkalie thya egipqanya kola ka registringyon ani angluni klasa” dela informacie o Haziri.

Pleurat Rudi, direktori e fundona shkolako “Zekeria Dushi” ani jakovaki komuna mothavela kay o haricune komunitetengo qhavore dosna registrinyona.

“Na si kay amen simen problemya ano registripe e minoritetengo, registripe e sakole personesko sito but sade, numay amen sar shkola simen problemya soske o minoritetya dosna shrdena te keren o registripe. Ano masek septembri amen shrda o siklipesko procesi thay o minoritetya odoya ver registrinena e qhavoren ani shkola thay o dosna aqhipya olende ovela”. mothavela o direktori Rudi.

Ayekha aqhola te dikhlol kobar o komunitetenge qhavore ka resen te vastinen o hako vash te registringyon ano shkole vash akava shkolako bersh ani Jakovaki komuna numay ini ani sasutni Kosova feri so registripe akale komunitetenge qhavorengo ani angluni klasa aqhola te ovel sfida.