NEVIPE

Protesta mamuy e policiaki violenca pedral o rom

  • 6 months ago
  • By Romtegra

Opre Roma Kosova adive ani Graqanica adikergya yekh protesta anglo policiako stacioni ani Graqanica. Akaya protesta avela palo pretendipya yekh jenosko e romane komunitetesko kay sito mardo kotar policiake sevalutne ani Graqanica.

“Opre Roma”, pretendinela kay yekh grupa kotar o policiake sevalutne vastinde brutaluni violenca pedral yekh jeno e romane komunitetesko khardo Burhan Ibrahimoviq kotar e Graqanica. E viktima e romane komuniteteski Ibrahimovic mothavela vash e romani redakcia ano RTK kay ov ni lela kan e albanyuni thay sebryuni qhib thay kay bizo nisavo mothavipe mardilo.

“Ko 19 ko savatone palo yekh na lekanipe kay sinemen e pashutne komshienca khardili e policia koya legargyama ani policia thay dengyaman yekh lil sar krisipe (kazna) vash soske si na mothavde. Palo odova me vakergyum olenge soske si akava thay kay ka rovape ani Prishtina. Palo kay lepargyum akava buderi policya qhivdeman ani soba kote uravenape thay odothe mardema thay khuvdema bizo aqhipe. Akava na si shukar, akala khuvdipya kay lelum shay ka nakhen numay me mangava kay akava te aqhavgyol kay ma te ovel vi yaverenge” mothavgya e viktima Burhan Ibrahimoviq vash o RTK.

Driton Berisha kotar e  “Opre Roma” organizacia mothavela peste qalardo e organizima protesta thay kay akava si angluni ver kay o roma vazdena poro avazo vash ayekha bilaqo vastipe mamuy o roma.

“Akava si angluni ver kay adikerdili ayekha protesta ani Kosova thay avlama shukar kay o roma organizisale kay anglo policiako stacioni kedisale thay protestinde vash e kerdi violenca pedral o roma. Musay te leparav kay ani rovlarin o policiake sevalutne ani Prishtina sine korektune ji kay o policiya ani Graqanica ani na ofisialuni rig tentinde te daraven e romen” vakergya o Berisha kotar Opre roma.

Vi o dizune kotar o ververutne than kotar e kosova kola buderi avena kotaro romano komuniteti solidarizinde peste akale akteya thay vakerde kay si mamuy akala bilaqe ovipya kay ovena pedral o roma kotar o kosovake siguripeske insstitucia. Ki yaver rig, o ovipe pe alav rodlargyola ini kotar o Kosovako Policiako Inspektorati.

“Referindoy tumare mangipeske Kosovako policiako Inspektorati konfirminla tumenge kay lela e rovlarin kotar yekh dizuno thay e yekhuni sitoy ani faza e preliminarune rodlaripeske” vakergya o Arber Beka, sevalutno kotar e Kosovaki Policia. Ov phengya kay ka lelon butya kola musay te phiravgyon phande e arakhipyencar kotar rodlaripe phanglo e auytorizipyencar krisyune kotar e Kosovako Inspektoriati e Policiako.

Avdi Misini, RTK-Radio