NEVIPE

ASK Gatisargyola vash populaciako registripe

  • 6 months ago
  • By Romtegra

Akava bersh ajukergyola te ovel o registripe e populaciako thay e Kosovaki Agencia vash Statistike kerela o gatisaripya vash te realizingyol akava procesi. E lepardi agencia kerela ledeipe e ververutne organizaciencar, mashkar yaver vi e phiravlinya Opre Roma Kosovo vash te ovel so may shukar kotorleipe e romane komunitetesko ano registripesko procesi. Ilir Berisha, phriavutno e butyako e sherune shefesko ani Kosovaki Agencia vash Statistike mothavela o nevipya kola si vash akava procesi.

“Amen dikhlargyam kay o komunitetya te oven reprezentime ano sah komune thay komunenge komisie. Ano alosaripe e registrantyengo thay dikhlarnengo ka oven kotar sah komunitetya, sar si pe detalya kay simen identifikingyam o tikne beshipeske thana thay kergyam musyaripe  kay sakoya komuna te ovelolen po yekh registranti kova ka kerel buti ani qhib e komuniteteski thay o dizuno kova mangela te registringyol pe piri dayaki qhib ka ovelole shaipe te rodel kay te realizinel akava” mothavela o Berisha.

Ov phenela kay ka kergyol yekh kampanya e godinipeske vazdipeski thay kay ka ovel vi azhutipe ano aplikipe e neve butyarnengo.

“Gendo e romane registrantyengo ka ovel reprezentimo e gendoa e populaciako kay sitoy reprezentimi ani dedikimi komuna. Sah o beshipeske thana kote si o komunitetya ka theren pere registranya. Vash amenge si but vasno kay o sah dizune e Kosovaka Republiakko te oven aktivune thay te den respodipe ano registripe e populaciako feri so akava sito may baro proyekti e Kosovaka Agenciako vash Statistike thay sheruno resipe sito o siguripe e informaciengo vash tikne beshipeske thana, jivdipeske kondicie, thay te azhutinen e politikake kerutne kay te keren politike vash o mangipya e dizunenge. May bare vijayutne e populaciake registripesko siton o korkore dizune soske dena o qaqutne informacie vash olenge mangipya” phenla o Berisha, phiravutno e butyako e sherene shefesko ani Kosovaki Agencia vash Statistike.

O ledeipe e Opre Roma Kosova sito bazirimo pe memorandumi e ledeipesko thay so may but te kergyol senzibilizipe e sakole komunitetesko kay te agor o detalya te oven qaqutne thay o procesi te ovel transparentuno thay o romano sevalutno ka azhutinel vash o mangipya e komunitetesko ani Kosovaki Republika. O gatisaripya siton  intenzivune thay siton o procedure e sheyenge gatisaripesko, puqlarne thay komisie siton alosarde thay akana ajukargyola te lelon o sheya kote ka instalingyon o aplikacie vash o puqlarne thay buti e stafesko kerde maksimaluno angazhipe vash te realizingyol o dikhlardo registripe e populaciako.

Avdi Misini, RTK-Radio