NEVIPE
Promovipeski konferencia “Barikane Roma ani Tromali Kosova”- Opre Roma Kosovo
- 3 years ago
- By Romtegra
Adive ani Prishtina adikerdili e konferencia khardi “Barikane Roma ani Tromali Kosova” koya sitoy kotor e transnacionaluna kampanyako ano may but se 15 thema e evropake ano kontektsti e avutne populaciake registripesko ani Kosova organizimi kotar Opre Roma Kosovo. Akaya phiravlin sitoy kotor e Roma Versitas Kosova organizaciako thay rafin KOSINT ka phiravel e godinipeske vazdipeski kampanya ani Kosova vash vasnipe e populaciake registripesko e romane komunitetesko ani Kosova.
E kampanya sila pe resipe kreiripe e informativune thay kulturaka atmosferako thay yaver resipya e phiravipeya e tentipyengo vahs kreiripe e may shuakrne kondiciengo vahs sah Kosovake dizune. Ano shrdipe e konferenciako vakergya o Avni Mustafa, direktori e Roma Versitas organizaciako kova phengya kay akaya kampanya sitoy vansi vahs te jangyol o qaqunto gendo e romengo ani Kosova vahs soske na kerdilo ji akana buti.
Vlora Latifi, aktivista thay jeni kotar e rafin KOSINT kay sitoy partneri akala iniciativakjo mothavgya o resipe e kampanyako. “Sasavipeya amaro resipe sito kay te ovel so may baro sahastaripe, te bayara e romane komunitetesko kotorleipe kola silen hako te deklaringyon thay sakova dizuno kova sile hako te prezentingyol so sito thay sa shunlape sar dizuno e Kosovaka Republikako. Amen sar duy organizacie kola kerena buti vash manushikane hakaya thay siguripeya kay shungyen vi e deklaracia e Poznaneski kay hramingya o kosovako raipe koya sitoy vash garavipe e komunitetenge hakayengo thay amen sar duy organizacie kola startingyam akaya kampanya siam kharde kay te garava thay te implementina akaya deklaracia vash manushikane hakaya ani Kosova”, vakergya e Vlora.
Romano aktivisti kotar civiluno malipe thay zhurnalisti Daut Qulangji ani konferencia dengya poro proposali kay ani akaya kampanya koya si vasni vash populaciako registripe te ovel so may baro kotorleipe e romane aktivistyengo.
Osman Osmani, direktori e organizaciako Nevo Koncepti vakergya vash mahatnipe e kampanyako thay kay o civiluno malipe dela poro phikoipe ano akava drom.
Fatmir Menekshe, terno romano aktivisti thay direktori e radio “Romano Avazo” mothavgya kay musay te kergyol shukar buti e resipeya kay o terne roma ma te registringyon sar yaver komunitetya.
Ano rami akala kampanyako ka lel kotor vi o romano aktivisti Edis Galushi khetane yekh romaniaka ledeutna ano rami e Autostraba Bienale koya ka adikergyol ano avgusti ano Prizren.
E kampanya “Barikane Roma ani Tromali Kosova” sila pe resipe kreiripe e informativune thay kulturaka atmosferako thay yaver resipya e phiravipeya e tentipyengo vash kreiripe e may shukarne kondiciengo vash sah Kosovake dizune. Resipe si kay pe 2022 bersh kana ka adikegryol registripe e populaciako te vazdingyol o godinipe e romane komunitetesko vash olengo registripe.
@o8f.f5d.myftpupload.com
Avdi Misini