Ofisi vash shukarno raipe pashe e Sheruneministreske ofisesko, ano ledeipe e proyekteya vash Socialuno hakaipe vash o Roma, Ashkalie thay Egipanya, mothavgya o bilansi e yekh bershune funksionipesko e „Nacionaluna platformako vash garavipe kotar diskriminipe e Romane, Ashkalyune thay Egipqnayune komunitetengo.

Direktori e Ofisesko vash shukarno raipe Habit Hajredini vakergya kay ano angluno bersh e phiravipesko akala platformako o anglipe sito dikhlo. Hajredini vakergya kay prekal e platforma mothavdile 23 ovipya e ververutne diskriminipesko.

„Ano akava periodi sinemen 9.976 vizitorya thay puterdile 637 profilya kola siton astarde ani platforma, 135 manusha lele e mobilyuni aplikacia thay simen 23 mothavde ovipya ani platofrma“, vakergya o Hayredini.

Kotar 23 mothavde ovipya e diskriminipeske 9 sine vash Egipqanya, 7 vash o Roma, 3 pedral Ashkalie thay 4 pedral yaver komunitetya. Ayekha vi kotar akala anglopenjarde ovipya 3 ovipya sukseseya alosardile, 10 siton ano procesi, ano duy ovipya ajukergyona o mothavipya, ji kay ano 8 ovipya na si dosta informacie vash te lungyargyon e buti. May buderi ovipya e diskriminaciake ovipyengo mothavdipe ani buti thay ano institucie, sar si sastipeske institucie, komune thay Ministria e andrune butyengi.

Dizunengo Avokati, Naim Qelaj vakegrya kay o principi e nadiskriminaciako dikhlola kay si yekh kotar sherune principya e hakaipeske sistemesko, numay sito yaver shey phiravgyola vay na o krisi vash nadiskriminipe ani praktika.

„Ovipya e diskriminipesko na savaht mothavgyona. Ki yaver rig, si harnipe thay nanipe ano sistemi e organizipesko e instituciengo kola lenape e ovipyencar e diskriminipesko, ano kedipe thay registripe e detalyengo thay informaciengo. Adive na simen niyekh situacia koya ko sasutnipe evidentinela thay mothavela o diskriminipeske ovipya, iranindoy olen ani baza e diskriminipeski ini pe yaver detalya kote odola ovipya musay te theren“, vakergya o Qelay.

Ov vakergya kay lansirisali e platforma vash te azhutinel ano akava aspekti, feri so dela shaipe vash lokho mothavipe e diskriminipesko.

Vi o Orhan Butiq, kotar e organizacia VORAE phenela kay akava si shukar shrdipe ani komparacia e yaver iniciativencar kay sine ji akana numay kola na reste shukar suksesya.

Nacionaluni platforma vash garavipe kotar o diskriminipe vash Romane, Ashkalyune thay Egipqnayune komunitetya formiringya o Raipe e Kosovaka Republikako ko yuni e bershesko 2022 vash te phikoinen o molipya definime e Kosovaka Konstitucia.

Platforma sitoy formirimi pe yuni 2022 thay sila pe resipe o angloaqhavipe e diskriminipesko e sah komunitetengo ano kosovako malipe. May angle ko septembri 2022 formirisalo Teknikuni butikeripeski grupa vash garavipe kotar o diskriminipe e komunitetengo Roma, Ashkalie thay Egipqanya ani Kosova koya sila mandati te alosarel o rovlarinya ano diskriminipe thay procesipe akale ovipyengo e godorne instituciengo.

Akaya platforma realizinela e Misia Terre des Hommes ani Kosova ano partneriteti e organizacia Voice of Roma, Ashkali and Egiptyans thay Fondacia HEKS, thay financingyola kotar Zvicraki Agencia vash Ledeipe.

RTK-Radio