INTERVISTA

Terne prandipya pandar sfida vash o komunitetya

  • 1 year ago
  • By Romtegra
Edi Gusia

Terne prandipya ko romane, ashkalyune thay egipqanyune komunitetya aqhona te oven yekh e sfidendar akale komunitetengo. Ano buderi sure o terne prandipya anena o riziko ko qhaya qhaya te aqhon ekonomikune umlavde ano sah jivdipe. On arakhlona e ververutne problemencar ano khamnipe thay ano bianipe. Palo odova, arakhlona ano ververutne forme e abuzipeske, silen problemya e bayripeya thay edukipeya e qhavorengo thay seriozune problemya ano buderi aspektya olenge jivdipesko. Phanglo akale puqipeya kerena buti ververutne organizacie numay ververutne kampanye thay proyektya phriavela vi Agencia vash Polyune Yekhipya. Phanglo akalea amen vakergya e rayna Edi Gusia, koya si sheruno e Ofisesko vash Polyune Yekhipya ano Sherune Ministresko Ofisi.

“Amen sar Ekzekutivuni Agencia ano rami e Sheruneministreske Ofiesko ledeingyam ano regularune baze e civilune malipeske organizaciencar, specifikune e RROGRAEK e orgnaizaipea e ververutne promovipeske kampanyengo, godinipeske vazdipesko. Mangava te phenav, vash te vazda o godinipe may buderi e terne qhayengo e romane, ashkayune thay egipqanyune komunitetengo ano angloaqhavipe e terne prandipyengo. Numay, akala umala niyekh ver na si dosta. Mangava te phenav, sakoya ver si than te kergyol buti ano vazdipe e godinipesko, te zorakerea e terne qhayen. Te sine kay dikha o detalya e bershesko 2017 sine 60 sure e registrime terne prandipyengo. Ano bersh 2018 sine 49 sure, ji kay pe bersh 2019 sine 37 sure registrime e terne prandipyengo”, phenela e sevalutni Gusia.

Numay, savo si o godinipe e raynako Gusia phanglo e terne prandipyencar kola ovena may buderi ko romano ashkalyuno thay egipqanyuno komuniteti thay save pharipya anena olende oy respodinla ayekha.

“Khuvena ano prandipe but may angle se olenge khetane bershune e yaver etniengo numay ini sastipeske aqhipya, faktikune meripe ano bianipe olende sito baro, numay ini jivdipesko lugipe ko qhaya thay romnbya e romane, ahskalyune thay egipqanyune komunitetengo sitoy but may harne desar o juvla e yaver etniengo. Akava mothavela kay ka afektingyon kotar nanipe e godinipeske vazdipesko, kotar nanipe e edukipesko, kotar nanipe e janipesko vash angloaqhavipe e but nasvalipyengo kola olen qalavena ano jivdipesko lugipe”, vakergya e Gusia.

Odova so anela pharipya ko aqhavipe e terne prandipyengo siton vi pahre socio ekonomikune kondicie. Numay so musay te kergyol, mothavela e Edi Gusia, sheruni e Agenciako vahs polyune yekhipya.

“Kosovake juvla siton numay 20% aktivune ano trego e butyako. Akate o qhaya e romane, ashkalyune thay egipqanyune komunitetengo qalavgyona may buderi. Siton may hari butyarne desar o juvla e yaver komunitetengo. Numay, so sito vasno sito kay te vazda o godinipe akale qhayengo kay sasava kondicia musay te lugyaren o edukipe. Olengo lungyardo edukipe thay skoluipe ano sah jivdipe sito anglo kondicia vash yekh savahtuno evolviripe thay pedral sah vash maripe e qorolipesko te sine kay dikha ano lungo vahti” vakerla oy.

O ververutne biraipkane organizacie kola kerena buti ano akava puqipe phenena kay o terne prandipya ko romane, ashkalyuen thay egipqanyune komunitetya tiknardile numay kay pandar si prezentuno.