Biraipkani organizacia Balkan Sunflowers ani Kosova phiravela panj edukipeske centrya. Duy edukipeske centrya phiravgyona vash qhavore kola nakhavena Serbiako siklipesko sistemi. O qhavore kola nakhavena o azhutipesko siklipe ano edukipeske centrya pe srbyuni qhib arakhlona e pharipyencar, mothavela o direktori e organizaciako BSFK, Muhamet Arifi.

“Balkan Sunflowers sile 5 siklipeske centrya thay ano momenti ano duy edukipeske centrya o programi adikergyola pe sebryuni qhib, may buderi o romane qhavore kola nakhana ani shkola ano paraleluno sistemi kay menajingyola kotar srbiako raipe. Si ververutne problemya, yekh olendar si kay o qhavore na silen dayaki qhib e sebryuni qhib thay akava automatikune sile qalavipe kay ma te ovelolen sukesi ano siklipe, feri so nane olengi dayaki qhib. Duyto si olengi socio-ekonomikuni situacia may buderi ano enklave, financialune problemya kola silen qalavipe kay o qhavore ma te ovelolen azhutipe kotar o dadalarya vay familiake jene kay te sikloven thay te agorinen o bukya kay dengyona kotar o shkole”, vakerla o Arifi.

Ov mothavela kay o phare ekonomikune kondicie e romane familiengo silen qalavipe kay o qhavore na silen suskesi ano shkole.

“Akava sile qalavipe pe kvaliteti e edukipesko, akala qhavore na silen shukar suksesi ano shkole. Ini soske o kriterya si dosta uqe thay yekh may baro problemi palo odova sito o lungyaripe e mashkaruna shkolako. Buderi e qhavorengo kay agorinena e fundoni shkola na lugyarena e mashakruni vash o sebepi kay na silen shaipe vay shkole ano lokacie kote on jivdinena. Ma te vakera vash o fakulteti kote yekh harno gendo e qhavorengo shay te arakhen ano fakultetya e kosovake”, vakergya ov.

O Arifi mothavela kay o qhavore kola agorinena e mashkaruni shkola ano paraleluno sistemi arakhlona e pharipyencar ano registripe e fakultetengo ani Kosova.

“Yaver problemi sito te sine kay o qhavore kay nakhena ano srbiako sistemi mangena te lugyaren o mahskaruno shkoluipe thay mangena te lugyren o fakulteti ani Kosova nashti te registringyon vash sebepi kay na akceptinengyona o diplome kola mekhlona kotar srbiako raipe. Akava automatikune limitinena kay on te ovelolen suksesi. Konkretune sure simen amen o fascilitiatorya kay agorinde e mashakruni shkola, kola mangena te lugyaren o fakulteti e edukipesko, bibahtake nashti soske na penjarena olenge diplome kay agorinde ani mashakruni shkola ano srbiako sistemi”, mothavela o Muhamet Arifi kotar e organizacia Balkan Sunflowers.