REF, palo 17 bersha alosargya te kerel interno transformipe thay nevi strategiya koya rodela may shukar poziciya vash o terne roma ano edukipasko niveli thay aver umala pe general vash o roma.
Direktori e Roma Education Fond – REF, Rejep Ali Chuipi, ano dendo intervju vash o RTK ulavgya may vasne thavdya kola si te oven evolvirime vash o akanutno thay avutne bersha. Leindoy pe dikhipe kay e tehnologia vi ayekha artificialuni intelegencia khelela yekh bari thay vasni rola ano amalipe, Chuipi vakerla kay sitoy gatisarne thay investirinena ko terne generaciye vash gatiseripe ano trego e ververtune treningyencar desar o burse kola ulavgyona ani lumiake thema kotar o REF.
‘’Amen araklola ano vakeripe e REF-eske bordeya vash te diklara o yaveripya, konkretipeya o avutne thavdya vash o avutne bersha. Leindoy pe dikhipe kay ji akana, 20 bersh sinem pashe e ternenge ano vervetune edukipaske aspektya kola azhutinde e romane ternen, amen mangaha kay akava drom te lungyara ini vash avutne abokar bersha, gatisaripeya e romen ano konkuripasko trego e averencar’’, vakergya Chuipi.
Ano puqipe, o REF si te ovel phikodeutno ini vash o studentya e ratorigune balkanesko sar ji akana sineto, o Chipi respodinla.
‘’Vash akava puqipe, amen si te iklova but sig e yekhe pratcaveya. Isiton pandar bukya kola kergyona andre bordi e REF-esko, thay palo olengo alosaripe, si te respodina ini pe ofisialuno drom vash akava puqipe, si te oven vay na involvime ini pe avipe o thema e ratorigune balkaneske sar kotor e programesko REF’’, mothavgya Chuipi.
Roma Education Fond, ano palune 20 bersha, sineton fokusirime ano duy programya e azhutipasko; stependiye vash o studentya (ano kobaripe 800 eurya) thay o grantya kola ulavdile vash o studentya (leindoy akate ini studiripya avri thaneske).
18 000 stependiye ulavgya ji akana o REF vash o 8 000 studentya e tercialune programesko andre studiripya andar o them thay avri olestar.
Konkretipeya vash e Kosova dendile pash 210 stependiye vash o 130 studentya ji akana.
‘’Sar kotar o bersh 2005, ani Kosova ji akana REF ulavgya 3 milionya eurya. Sar ano raiapske programya, sar vi ayekha ano naraipne organizaciye, leindoy ini studentyenge stependiye. Kotar o bersh 2005 ji akana, e situaciya laqhardili, numay pandar isiyamen pharipya kola musay ketane te alosara thay te phira pandar angle ano edukipe’’, mothavgya Chuipi.
REF, Romano Edukipasko Fondi si mashkarnacionaluno fondi kova ulavgyola ano ververtune lumiake thema vash vazdipe kapacitetya edukipaske ko romane studentya thay sikavne. Sar kotar o kreiripe akava fondi ano bersh 2005, sar si pe ofisialune mothavna kay 10 000 studentya agorinde pere studiye thay lele phiko kotar akava fondi, ji kay ani e sah lumia gendo e jenengyo kola lele phiko vi ano sekundaruno edukipe sito may baro.
Autor: Denis Galushi, RTK-Radio
