28 Yuni si dive kana o sah kovaqya, vay buderi olendar festinena akava dive sar ‘’Piresko dive’’ vay Dive e Kovaqyengo. Ayekha nakle kurkoste akava dive hramisalo vi ani Kosova, thay kana vakera vash akava shelbershuno zanati, Prizreno sito ano angluno than kote si may baro gendo frekuentimo. Numay kobar ano nakhipe thay kobar avdive kultivingyola akava zanati, mothavgya vash e Radio Kosova, Mensur Halabak, yekh e kovaqyendar.
Prizrenoske roma siton frekuentime ano sakova kotor e dizyako. Olengo profili identifikingyola may buderi ano thanipya kote araklona. Ayekha thanipe ‘’Bazhdarhana’’, penjargyola sar mahala e kovaqyengi e romengi thay na numay.
Roma, akate penjargyona ini e nofka sar ‘’esnafya’’ (elitaruno amalipe). Ayekha, amen thergyem shaipe te kera yekh intervista e Mensur Halabakoa, kovaqi. Akava zanati e kovaqesko ov phiravla akana buderi desar yekh shtar shelbersha.
Mensuri, kovaqluko phiravgya kotar babosko dad sar kotar o Osmanliengo vahti, ayekha sar si pe leste.
Numay, kana puqlem ole, si te phiravel mi akava zanati vi e qhavorenge ov, e yekha dukha respodingya;
‘’Na. Akana sito vahti e teknolojiako. Amen, abokar kobar thergyem zoralipe, phiravgyem thay lelem o zanati vash te parava amare familiye, ji akaya avdive si phare te kergyol ayekha diso’’, mothavgya Halabak.
Olesko avazo mothavla kay akava zanati divestar ano dive telargyola, numay prekal o vakeripe riirandilo barvalipe thay losh oleski koya prekal o nostaljikune puqipya biqhaldemen ani retrospektiva oleska qhavoripasko, kote e bare barvalipeya mothavla sine vash o anglune bajakya e kovaqlukosko…
Vash may buderi, arat pe ora 20;30, ani Radio Kosova 2, ani sakoya autorialuni emisia ‘’Romano Avazo’’ shay te shunen olesko pherdo vakeripe ani emisia dedikimi ‘’kovaqlukoske’’.
Autor: Denis Galushi, RTK-Radio
