EDUKIPE

Komunitetenge mangipya ani Jakovaki komuna

  • 5 months ago
  • By Romtegra

Ani Jakovaki komuna o Komiteti vash Komunitetya adikerla rendune kedipya vash te diskutinen e situacia e komunitetengi ani leparni komuna. Armend Behluli, direktori e ofisesko vash Komunitetya thay Iranipe ani Jakovaki komuna mothavela vash o mangipya e komunitetenge ani akaya komuna.

Armend Behluli
Sheruno e Ofisesko vash Komunitetya thay Iranipe – Jakovaki komuna

Kotar dirketoriati vash edukipe ano kedipya e Komitetesko vash Komunitetya ani Jakovaki komuna dendile informacie vash edukipeski situacia, mothavela o Armen Behluli. “Sar si pe direktoriati vash edukipe raportisalo kay sine yekh tikno peshelipe e siklovnengo kay na lele kotor ani platoforma onlayn koya adikerdili ko nakhlo vi akava bersh kotar panjto ji enyato klasa, thay buderi olendar sine kotar ormane ashkalyune thay egipqanyune komunitetya. Olenge manglape but tehnologiake sheya vash te khuven ano akala platforma thay sah azhutipyencar kay sinemen odola tehnologiake sheya te dengyon odole qhavorenge kay sinelen pharipya ano akava vahti”, mothavela o Behluli.

Ov phenela kay ani Jakovaki komuna sito godornipe e sikavnengo vash angazhipe e qhavorengo kay silen ahqipya ano siklipe. “Sito godornipe e siklovnengo kay te keren buti vash qhavore kay silen may buderi pharipya ano edukipe, ini komunitetya vazdena poro godinipe thay vash komunitetya sine bare lokhipya prekal o azutipya ano kherune siklipya thay ani akaya forma kergyam buti kay te laqhara o edukipe ko komunitetya ini soske yekh siklovno kova agorinela e shtarto klasa thya iklola ani panjto thay na janela hramipe drabaripe odoye ver direktune sito godornipe e sikavnesko soske on musay te keren buti olencar may buderi, akava si bibahtalipe kay ovel ako komunitetya. Iklona ani panjto klasa thya nesave olendar na janena hramipe drabaripe. Siton tikne sure akala numay amen na manga te ovelmen ayekha sure”, vakarla o Behluli.

Kana vakergyola vash butyaripesko puqipe ano kedipe e Komitetesko vash Komunitetya vakerdilo kay o komunitetya ani Jakovaki komuna lugyarela te arakhelpe e bibutikeripea. “Situacia ko sasutnipe ani jakovaki komuna na sitoy shukar, soske si manusha kay jivdinena e socialune azhutipyencar thay yekh baro gendo kerel abuti e sezonalune butyencar thay pandemia ano akava aspekti sinela but bilaqo qalavipe. Na si yekhuno sar ani pandemia thay pandemia kergya piri buti thay e situacia si ayekha thya musay te regulingyol ano aspekti e ekonomikune evolviripesko”, phenela o Behluli.

Sheruno e ofisesko vash Komunitetya thay Iranipe ani Jakovaki komuna, Armend Behluli vakerla kay arakhlona e pharipyencar vash te vazden o godinipe ko komunitetya vash vaksinipe. “Komunitetya ani Jakovaki komuna sar si pe informacie kay simen na silen but godinipe vash vaksinipe, thay sitoy yekh sfida soske musay te kera may but buti vash te vaksiningyon. Vaksinipe shrdingya thay sar si pe informacie o komunitetya kay intervistisale pedral 99 pe shel deklarisale kay na lena e vaksina. Amen sar dikha pandemia na ka giriqiel yekhe diveske thay na sito alosaripe.”Publikune kharava te vaksiningyon soske si phari epidemiaki situacia, ano momenti kana avla shansa savore shay te vaskiningyon”, vakerla ov. Mashkar yaver o Behluli mothavela kay gatisarena kampanye vash te vazden o godinipe komunitetya vash te vaksiningyon.

“Planifikina kampanye vash vazdipe e godinipesko, ka iklova amare partneryencar vash te ulaven informacia. Sah komuniteti ani kosova janena kay sine meripe kotar o koronavirusi thay musay te len pe dikhipe akava baro gendo e meripyengo kotar koronavirusi thay dikha sako dive kay si ververutne variante thay sito baro riziko. Ko sasutnipe musay te angazhingyova savore ayekha kay o komunitetya te godiningyon kay vaksinipe musay te kergyol. Ka adikera kedipya ano mahale thay eksperteyencar vash te biqhalen mesazhya ko komuniteti thay te vaksiningyon, mothavgya o Behluli.

Akala puqipya regularune diskutingyona ano kedipya e Komitetesko vash Komunitetya ani Jakovaki komuna vash kolenge mothavgya o Armend Behluli, sheruno e Ofisesko vash Komunitetya thay Iranipe.

Avdi Misini