KOMUNITETI

Ano Prizren puterdilo o Ternengo Kulturako Centro

  • 1 year ago
  • By Romtegra

Ano Prizren ano akala dive festingyola o bershipe e tromalipeske divengo thay ano rami akale festengo puterdilo vi o Ternengo Kulturako Centro.

Ano puteripe lele kotor sheruno e Prizrenoska Komunako, Mytaher Haskuka, Taloministri e Kulturako, Terne thay Sporti – Sejnur Veshall, Direktori e Kulturako, Terne thay Sporti – Arhim Ajazi thay reprezentya kotar o amaterune teatrya e Prizrenoska Komunake.

Ano akava centro ka organizingyon buderune kulturune aktivitetya thay ka vastingyol sar than kote o amaterune teatrya shay ka keren pere prove thay gatisaripya vash o drame. “Kulturuno Centro ka pherel o rodlaripya e amateryune grupengo thay e kulturune organizaciengo feri so ano Kulturako Kher “Xhemajli Berisha” ovenay but aktivitetya thay na sine yekh rendipe e aktivitetyengo, sah e Komunake aktivitetya nashti reslonay te realizingyon odothe.”, vakergya o komunako sheruno Haskuka.

Ano puteripe lela kotor vi o Sejnur Veshall, Taloministri e Kulturako, Terne thay Sporti. Ov phengya kay e kulturaki diz o Prizreno korkoro afirmingya piri kosovaryuni kultura thay e kulturuni diplomacia koya promovinla ani lumia deindoy yekh than vash o amateryune teatarya kote shay te promovinen pere kulturune molipya sar e qhib, kultura thay tradicia. “Amen, sar Ministria e Kulturaki ka ovelmen yekh khetano butikeripe e Prizrenoska komuna kay akava obyekti ten a aqhol bizo kulturune ovipya thay aktivitetya kola promovinena e teatrenge kualitativune moldipya” phenla o rayo Veshall”, phengya o Veshall.

Direktori e Kulturako, Terne thay Sporti e Prizrenoska Komunako, Avni Ajazi phengya kay akava Ternengo Kulturuno Centro si te menajingyol kotar o albanyune, romane, turkyune amateryune teatrya, kote pere prove shay te phiraven bi problemesko. “Akale centrosko koboripe si 66 mile euro, thay ano duyto faza planifikingyona kay pandar 20 mile euro te vastingyon vash o rekuizitya, kompyuterya thay aver sheye.”, phenla o Ajazi.

E centro sile yekh skena e kapacitetea ji 50 spektatorya, duy livne vash gardaroba thay duy livne vash o tekstualune prove.