Ano gav Yanyeva e Lipyaneska Komunako ano akala uqe nilayeske temperature pashe e phare jivdipeske kondicienge o roma arakhlona e nanipeya e piyipeske panyesko. Sar elementaruno mangipe vash sako divuno jivdipe ano khera e romane familiengo o piyipesko pani si nanipe. Akava nanipe si vi ano yevend thay akale pharipeya arakhlona vash yekh lungo vahti.
Ini kay o yaver thana silen pani o roma ani Yanyeva musay te iklon te pheren pani kotar o gaveske qesme vay kotar o bunarya. Sar phenela o thanutne nikaste na interesinela vash akava pharipe, mothavela o Enes Gradina thanutno e gavesko Yanyeva.
“Amen si problemi o piyipesko pani nilayeske vi yevendeske. Qeshme simen numay pani nanemen thay akava si problemi. Niyekh na avela te puqel sar jivdina, vakerde kay ka aven te dikhen vash o kanalizipe numay niyekh na avel, so ka ovel odole proyekteya niyekh na janel. Avena numay kana si o vote thay amen na dikhena, dena lafi numay niso. O Romnya phiravena pani kofenca vay balonenca thay akava si but pharipe”, vakergya o Enes Gradina.
Vi e yaver romani juvli Esma Gradina mothavela vash o pharipya vash sakodivuno jivdipe bizo pani ko akala romane familie.
“Savo jivdipe amen jivdina, may sheruno si kay na simen pani. Nashti te kere bizo pani, nashti te thove te vasta. Amen siam may qalavde akate ani mahala bizo pani. Bizo pani nashti te kera niso” mothavela oy.
Ani romani mahala ano gav ani Yanyeva jivdinena pashe 200 roma thay o romane thanutne pakyana kay e mothavipeya akale problemesko prekal akala medie shay ka adresingyol o puqipe ano lokalune institucie ani Lipyaneski komuna.
Avdi Misini, RTK-Radio
