Ministria vash Edukipe, Skencia, Tehnologia thay Inovacie ko nakhle trin bersha azhutinla financiarune vash funksionipe e edukipeske centrengo vash romane, ashkalyune thay egipqanyune siklovne kola azhutingyona ano edukipesko sistemi. Kotar 2021-to bersh e ministria planirinela buxheti vash azhutipe e biraipkane organizaciengo kola phiravena o edukipeske centrya, vakergya vahs RTK e Nazan Safci, godorni vash komunitetya ani Ministria vash Edukipe, Skencia, Tehnologia thay Inovacie.
“Vash trin bersh rendoa, kotar o bersh 2021 shrdingya te planirina bujeti vash akala siklipeske centrya vash o biraipkane organizacie kola phiravena o edukipeske centrya thay o planirimo bujeti sine 200 mile euro thay ayekah yekhuno bujeti phriavdilo ano duy avutne bersha, ano 2022 thay 2023” vakergya e Safci.
Oy phenela kay ko 2021 bersh sinelen numay trin vijayutne feri so but hari aplikinde thay kriteri sine kay te oven registrime o edukipeske centrya ani ministria ji kay ano 2022 bersh vijainde may buderi organizacie kola phiravde 14 edukipeske centrya.
“Ano bersh 2022 registrisale may buderi edukipeske centrya ani Minsitria thay vijainde 5 biprakiane organizacie kola phiravena akala 14 edukipeske centrya thay vi akava bersh o bujeti si 200 mile euro thay e MESTI publikingya o kharipe ini vash aklava bersh thay bazirimo pe kriterya ko akava bersh vijainde 7 biraipkane organizacie organizacie kote ko sasutnipe si 21 edukipeske centrya kay vijainena kotar akava fondi” phengya e sevalutni Safci.
E Nazan Safci, godorni vash komunitetya ani Ministria vash Edukipe, Skencia, Tehnologia thay Inovacie mothavgya kay ko bersh 2021 harjisale 97 mile euro vash o sebepi e tikne gendoske o organizaciengo kay vijainde numay kay ko nakhlo thay akava bersh o bujeti harjisalo thay ulavdilo ko sasutnipe vash funksionipe akana e 21 edukipeske centro vash pheruno siklipe e romane, ashkalyune thay egipqanyune siklovnenge ani Kosova.
Autor: Avdi Misini, RTK-Radio
