Bilaqi samay ko akava kurko astargya kotor e Balkaneske kote ano nesave kotora e Kosovake alo ji ko rumipe ani elektrikuni rafin, thay yekh genbdo e konsumatorengo aqhile bizi elektrika. Vakerindoy vash akaya tema, tabloidi Srbia Danas decisingya vash bombastikuno, numay na qaquno alav, vakerindoy kay elektrika na sine ani sah Kosova. Pe yekhuno vahti akale nevipeske e yekhuna tema dende vi politikuno konteksti.

„HOHAVDO THEM NIYEKH VER ANO MAY BARO PROBLEMI: Silen totaluno kolapsi, elektria nashti ano sah them„, sito alava kole ko akava kurko publikingya akava tabloidi.

Resursi e nevipesko sito Tanyug, kova poro nevipe anavingya „Aqhavipe e elektrikakop ani Kosova vash bilaqi samay“, bi mothavdo o informacie kay elektrikuni energia nashavdili ani sah Kosova.

Ini kay e Srbia Danas ano alav mothavela kay e elektrika aqhili „ano sah them“, vay kay „hohavdo them niyekh ver na sine ano may baro problemi“ ano korkoro teksti akaya informacia na sine pheruni, vay akava ni na mothavgyola.

Konstatingyola kay vash but bilaqi samay „ani sah Kosova“ alo ji ko qhinipe e telengo thay peripe e banderyengo, so angya ji ko aqhavipe e furnizipeya e elektrikuna energiako.

Akaya media raportinela kay may bilaqe qalavdile o regionya Prishtina, Pekya, Ferizay thay Mitrovica, thay kay ano may baro kotor e Graqanicako na sine elektrika ji trin orya ko savatone ji pe ora12 ko purano kurko.

Vash informipe vash „qhinipe e telengo thay peripe e banderengo“ ko agor akale tekstesko sar resursi lepargyola e Kompania vash distrubuipe e elektrikuna energiako ani Kosova (KEDS).

KEDS vakergya kay o rumipya ka cidingyon ano may tikno vahti thay ruyjingya e dizunen vahs kanleipe, akala lavyorya agorinela o teksti kova ikaldilo ano tabloidi Srbija Danas, a kolako autori si qaqipea e agencia Tanjug.

Kay o zorale balvala  kerde hasari ani elektrikuni rafin ani Kosova, thay kay may bilaqe qalavdile o Ferizay, Prishtina, Mitrovica thay Pekya, KEDS ko purano kurko ano palo mismereske orya infomringya prekal ververutne fotografie e pelarde banderengo.

Numay, ano yekhuno ayekha informipe vakergyola kay ”nekobor” konsumatorya aqhile bizo elektrika, numay na sar vakerla e Srbija Danas, „sah o them“ ano teksti kova publikisalo shtar orya may dur.

Zorali balval ko purnao kurko angya rumipe ini ano elektrikuni rafin ani Upruni Kosova, ayekha kay o dizune e Mitrovicako ano duy vera, harne, aqhile bizo elektrika.

Ayekah vi, sar si pe vakeripya e RTV Kim, nesave iranipeske gava – Osojane, Koš, Žač, Šaljinovica, Suvi Lukavac i Tučep ko savatone sine bizo elektrikuni energia.

Resursi: KoSSev