NEVIPE

Shrdela o Karavani e Antijipsizmesko ani Kosova

  • 4 weeks ago
  • By Romtegra

Antijipsizmo sito fenomeni dosta puterdo ani lumia kova andar peste sile rasyuno diskriminipe, getoizipe thay anglokrisipya buderi vash o jene e romane, ashkalyune thay egipqanyune komunitetengo. Odoleske e organizacia VORAE thay Terres des Hommes shrdindoy kotar 01 novembri ji pe 12 novemri ka organizinelo Karavani e Antijipsizmesko ano gava thay dizya e Kosovake, informinla o Muharem Aslani, sevalutno e organizaciako Vorae. Ov phenela kay resipe akale karavanesko sito vazdipe e angazhipyengo vash treteripe thay maripe akale fenomenesko, vakerla ov.

“Ano prizreni, may laqho than e kosovako o karavani e antijipsizmesko kova sile pe resipe o sensibilizipe e buhle opionionesko vash fenomeni e antijipsizmesko. Shay harne te mothavav so sito antijipzimo, sito diskriminipe kay ovela mamuy roma, ashkalie thay egipqanya pedral rasyuni baza. Amen prekal akava programi manga te mara akava fenomeni thay akala procesya. Diskriminipe ovela ano mahale kote on jivdinena, diskriminipe ovela ani umal e edukipeski, ano shkole, o diskriminipe ovela andre o shkole, Karavani e antijipsizmesko shrdingya ani prizrenoski komuna thay ka lungyarel vash 12 dive ano sah bare dizya e kosovake kote jivdinena o komunitetenge jene, ka nakha te vizitina olen sar adive nao prizren. Resipe sito kay te sensibizilina o buhlo oponioni vash te kreirina yekh aktivuno dizunipe vash te eliminina e na kamipeski qhib, maripe e pezhorativune termyengo pedral akala komunitetya. Amen gndina kay te cida akala ovipya prekal amare programya”.

Sabina Berisha, kotar e Vorae organziacia vakerla kay akava diskriminipe ano multinetikuno prizreno na sito buhlardo, ji kay phengya kay ano akava aktiviteti, jene akale komunitetengo ka ovelolen shaipe te infomringyon may buderi vash o ovipya vash maripe e antijipsizmesko.

“Leindoy pe dikhipe kay o prizreno sito multikulturuni diz na sito but buhlardo. Phiravipe ano lila sito shukar numay kobar si ani praktika. Kobar respektingyola o peshelipe e butyaripesko ano komunaluno niveli, kobar respektingyona o qhavore, sito yekh puqipe vash koleske rodlara kobar respektingyona akala kounitetya. Vash akava sebepi amen kedingyam e jenen akale komunitetengo kay te informingyon vash pere hakaya thay ma te mekhen kay o yavera te diskrimininen olen”.

Akava aktiviteti shukar ajukerdilo ini kotar Islam Elshani, sevalutno vash komunitetenge hakaya ano ofisi vahs komunitetya thay iranipe ano prizren apelindoy kay te ovel maripe e diskriminipesko.

“Akava kedipe sito but shukarno kedipe, sito vash maripe e antijipzizmesko, jangyola kay ani sah evropa o antijizpizmo sito but buhlardo numay ano sah evropake thema kergyola buti ano nashalipe e antijipzimesko, respektivune diskriminipe, anglokrisipe, racismo thay yaver. Ini ani Kosova musay te kergyol buti ano maripe akale fenomenesko.
Akava aktiviteti kova agorinela pe 12 novembri ka adikerel ini yaver godinipeske vazdipeske aktivitetya numay ini loshalipeske, informinena pe agor o organizatorya”.

@romtegra