Ani Prishtina adive shrdingya o Romano Samiti e Ratorigune Balkanesko 2022 organizimo kotar Civil Rights Defenders. Akale bershuni tema sitoy fokusimi ano “Thanipesko Hakaipe thay Romano komuniteti” e Ratorigune Balkaneske themyengo vash te implementinen ko sasutnipe o standardya e mashkarthemunte manushikane hakayengo.

O kedipe putergya e John Stauffer, legaluno direktori thay talo ekzekutivuno direktori e CRD organizaciako. Ov phengya kay o Romano Samiti sito ovipe vash yaveripe e ideyengo vash phiravipe e romane puqipesko angle. On sar CRD organizacia savaht siton ani rig vash te garaven o manushenge hakaya, ani akaya rig vi o romenge hakaya.

“Sheruno vasnipe si kay amen ova khetane, civilune malipeske organizacie, manushikane hakayenge garavutne thay kera khetane o zoralipya vahs te dikha te phikoina yekhe yavere, Civil Rights Defender kerela akava samiti sar platforma kay o roma te oven khetane, thay te zorakeren o kapacitetya vash te oven may efektivune. Romano samiti kergyola vash te dengyol kontributi ano respektipe e manushikane hakayengo kay ovena pe roma”, vakergya o Stauffer.

Ano puteripe e Samitesko prekal video mesazhi vakergya vi e Viola von Cramon kotar Evropako Parlamenti.

“O romano komuniteti ano ratorigune thema siton ano pharipe kay te arakhlon e edukipeya thay butyaripeya thay vash akaleske musay te keren savore buti, sar o roma ayekha vi o institucie vash te anen e romengi situacia ano may shukar pozicia thay te oven pherdo kotor e malipyengo kote jivdinena”, vakergya e Cramon.

Ki yaver rig, o Cristi Mihalache, Uqo dodieutno vash Romenge thay Sintyenge puqipya ano ODIHR mothavgya kay buderi thema kerena buti ano kreiripe e politikengo vash laqharipe e romenga poziciako numay kay musay te oven konkretune bajakya ano may but pasharipe e romengo ano decisiako leipe thay qaqutno ulavipe e bujetengo vash implementipe e politikengo vass romengo integripe.

Ano angluno dive lugyaridili e panel diskusia vash e tema vash Thanipesko hakaipe thay Romano Komuniteti kote ulavdile ververutne eksperience kotar vakerutne thay profesorya vash thanipesko hakaipe ano ververutne thema.

O Romano Samiti adikergyola duy dive prekal o virtueluni interneteski platforma kote o sheruno resipe si kay o romane aktivistya, organizacie thay institucie e Ratorigune Balkanesko te diskutinen vash o romane puqipya thay ikalipe e musayutne rekomandipyengo kola biqhalgyona e raipyenge vash te implementinen o mase vash romengo integripe. O sherune panelya vash diskutipe siton sfide ano zorakeripe e romenge kotorleipesko, juvla sar kotorleutne e raipesko, hakaipe thay kultura vash maripe mamuy diskriminacia thay rasizmo.

Avdi Misini/RTK