NEVIPE

Romano Samiti e Ratorigune Balkanesko ani Prishtina

  • 2 weeks ago
  • By Romtegra

Ani Prishtina adive shrdingya o Romano Samiti e Ratorigune Balkanesko 2021 organizimo kotar Civil Rights Defenders. Sheruno resipe e samitesko sito te kedel e romen, akteryen thay institucien kotar o ratoriguno Balkani thay Turkia vash te diskutinen vash o antijipsizmo, sistematikuno diskriminipe thay ushkavipe e manushikane hakayengo. O kedipe putergya e Goran Miletiq, direktori vash Evropa ano Civil Right Defenders. Ov phengya kay si trin mekanizmya andar o thema kay siton phangle vash romengo puqipe. On sar CRD organizacia savaht siton ani rig vash te garaven o manushenge hakaya, ani akaya rig vi o romenge hakaya.

Ano puteripe e Samitesko lela kotor ini o Peter Polak trhay Evin Incir kola siton jene e Evropake Parlamentesko. Numay mashkar o buderi kotorleutne sar ani fizikuni konferencia kay adikerdili ani Prishtina ayekah vi prekal virtueluni platforma vakergya vi e Senada Sali kotar ERRC organizacia koya mothavgya sar marelape vash respektipe e romane hakyengo ani evropa.

Kotar o romano civiluno malipe ani kosova sine but harno o kotorleipe thay siton kharde numay nesave jene e civilune malipesko. Yekh olendar si o Avni Mustafa, sheruno e organizaciako Roma Versitas Kosova kova phenela kay ayekha samitya siton vasne vash romane puqipesmo vazdipe ani may uqi agenda.

Ki yaver rig o Driton Berisha, koordinatori e REF ani Kosova si hari may kritikuno kay ano ayekha kedipya musay te ovel may baro gendo e romengo soske bizo roma nashti te phiravgyon decisiake leipeske iniciative.

O Romano Samiti adikergyola duy dive prekal o virtueluni interneteski platforma kote o sheruno resipe si kay o romane aktivistya, organizacie thay institucie e Ratorigune Balkanesko te diskutinen vash o romane puqipya thay ikalipe e musayutne rekomandipyengo kola biqhalgyona e raipyenge vash te implementinen o mase vash romengo integripe. Kotorleutne ka len yekh dikhlaripe e Evropake Instituciengo thay e rola kay on khelena, specialune vash darakeripya kay kerena ano avrune butya e EU. Kotorleutne ayekha vi ka ovelolen yekh ideya kola institucie siton interesantuno drom vash garavipe e manushikane hakayengo, sar te akcesinen pe lende thay so shay te keren on vash manushikane hakayenge garavutne kotar Ratoriguno Balkani thay Turkia.

Avdi Misini