Prizrenosko komunaluno sombeshipe yekhune avazoa alosargya o manglo decisipe vash o penjaripe e romana qhibyako ani leparni komuna. Palo but bershuni iniciativa, o mangipe e romane komunitetesko ano Prizren vash o penjaripe e tradicionaluna romana qhibyako ano oficialuno vastipe akava lunyako dive alosargya e Prizrenoski komunaluni asamblea.

E rafin e biraipkane organizaciengo vash e romani qhib thay e organizacia Nevo Koncepti, kola sine iniciatorya akale mangipesko si but qalarne thay loshale akale decisipea thay alosaripea e mangipesko vash o penjaripe e qhibyako. Kordinatori akala rafinako vash o penjaripe e roamana qhibyako sar qhib ano oficialuno vastipe o direktori e Organizaciako Durmish Aslano, Fatmir Menekshe, naysi kergya saren e akteryen kola dende phiko ani leparni iniciativa sar kay e Evropake Koncile sar donatori e proyektesko vash o aktivitetya kola lelile vash o leparno mangipe.

Ano leparno beshipe e Komunalune Sombeshipesko o sheruno e Prizrenoska komunako Shaqir Totay, vakergya kay o Prizren mothavgya kay si multietnikuno thay kay garavla sah o komunitetya bizo yaveripe.

Buhli dimenzionaluni kultura ano Prizren kerla e diz yekhuni thay shukarni vash o jivdipe, numay mashkar o ververipe e amalipesko si ini o Roma kotor e mozaikosko kova astarla o Prizren, kola tradicionalno shelebershencar jivdinena ano Prizren thay si semno barvalipe e amalipeske thay kulturake integritetesko ano Prizren, diz koya si penjardi vash o multikulturalizam thay khetano jivdipe e sah komunitetyencar.

Adive agoringyam yekh kotar o may semne puqipyengo e romane komunitetesko ano Prizren, kote kerdilo buti buderi bershencar vash te resen ji pe akava momenti kova ake adive reslilo. E leparne komunaluna sombeshipeske beshipeste alosargyam vash o penjaripe e roamana qhibyako sar qhib ano oficialuno vastipe ani Prizrenoski komuna.

E qhib si kotar o vitaluno semnipe e manushipesko thay o leparno komuniteti sile yekhuno barvalipe thay mashkar o prioritetya e komunako si garavipe e manushikane hakayengo sar kay vash o sah Prizrenoska komunake dizune, bizo yaveripe, ayekha vakergya o sheruno e komunako Shaqir Totay.

Daut Qulangji/RTK