E organizacia Nevo Koncepti ani Prishtina adikergya nacionaluni konferencia e tema “Riintegripe e riinarde personyengo kotar e sasti Evropa ani Kosova” ano rami e proyektesko Reach II, implementimo ani Prizrenoski komuna.

Sheruno resipe e konferencako sito te diskutingyol vash o sfide thay resipya ani umal e reintegripeski e personyengo kotar romane, ashkalyune thay egipqanyune komunitetya. O riirande personya silen mangipe vash reintegripe ano skoluipe thay butyaripe thay prekal akava proyekti amen reslam te azhutina buderi se 20 riirande familien, vakergya o Osman Osmani, direktori e organizaciako Nevo Koncepti.

“Kotar e vala e migripeski pe 2014 bersh irandile pale o familie akale komunitetengo, amen reslam kay prekal akava proyekti te reintegrina ano skole e qhavoren numay ini te azhutina e familien vash te evolvirinen pere biznesya thay te integringyon ano malipe”, vakergya o Osmani.

E Talosheruniministra Emilia Redzepi naysingya e organizacia Nevo Koncepti thay o romano civiluno malipe vash e buti kay kerna ano kotorleipe e komunitetengo ano kosovako malipe.

“Bahtakerava o Nevo Koncepti vash e ji akanutni buti ano azhutipe e romane, ashkalyune thay egipqanyune komunitetengo vash integripe thay kotorleipe ano kosovako malipe. O proyekti kay phiravena sito yekh pharo proyekti soske mangela te kergyol buti ano tereni e konkretune surenca. Ano akava aspekti sito vasno vi o phikoipe e instituciengo feri so savore amen musay te jana kay siamen sherune hakaya kola musay te respektingyon. Me ajukarava kay te kergyol vi may buderi buti kay o romane qhavore te ovelolen skoluipe pe romani qhib ani fundoni shkola soske akava sito olengo elementaruno hako. Ano akava aspekti thay yaver integripeske procesya situmen pherdo phikoipe kotar e instituciengi rig”, vakergya e talosheruniministra Redzepi.

Ki yaver rig, taloministri vash edukipe thay skencia Dugagjin Pupovci lepargya o kontributi e civilune malipesko ano laqharipe e poziciako e romane, ashkalyune thay egipqanyune komuniteyengi ani Kosova.

“May angle musay te kergyol naysipe e civilune malipeske thay donatorenge sar si o Karl Kubel Shtiftung kola 20 bersh dena phiko ano laqharipe e situaciako akale komunitetengo. Kana vakergyola ano edukipesko aspekti kerdile shukarne butya vash laqharipe e poziciako akale komunitetengo numay kay musay pandar te kergyol buti. Amen simen shukar koordinipe e aktivistenca thay civilune malipeya kotar o romane, ashkalyune thay egipqanyune komunitetya thay o mangipya akale komuniteyengo sito adresime vi ano stratejikune dokumentya. Siam savaht gatisarde kay te da phiko ano skoluipe thay naysinava o civiluno malipe kola prekal o proyektya pherena o quqipya thay bayarena vi o angazhipe e instituciengo”, vakergya o taloministri Pupovci.

Ji kay o Heiko Flink, koordinatori e Fondaciako Karl Kuber Stiftung vakergya kay nays akale proyekteske lele o inputya thay o mangipya kay te lungyargyol o may dur phikoipe e komunitetengo ano avutno proyekti.

“Amen kera pashe 20 bersh buti vash te phikoina e qhavoren thay familien ani Kosova vash yekh may shukar jivdipe. Avlama shukar kay o proyekti Reach dengya shukar rezultatya vash reintegripe e irande personyengo. Akava proyekti thay akaya konferencia delamen shukar inputya vash te koordinina o mangipya vash te lungyargyol o avutno proyekti e resipeya vash laqharipe e situaciako e romane, ashkalyune thay egipqanyune komunitetengo”, vakergya o Heiko Flink kotar e Fondacia KKS.

Ani konferencia lele kotor vi reprezentya kotar Ministra e Andrune Butyengi, Ministria vash Komunitetya thay iranipe, lokalune Direktoriatya vash Edukipe thay lokalune Ofisya vash Komunitetya thay Iranipe.

Proyekti Reach II sito ani duyto faza e implementipesko thay agorinela ko akava bersh. Sheruno resipe e proyektesko sito o reintegripe e riirande personyengo kotar romane, ashkalyune thay egipqanyune komunitetya kotar e sasti Evropa ani Kosova ani Prizrenoski komuna.

Avdi Misini/RTK