NEVIPE

LPRK gatisardi vash te triumfinel ani Prizrenoski Asambleya

  • 2 weeks ago
  • By Romtegra

LPRK-eski partiya irati phiravgya angloalosaripyengi kampanya ano kuadro e lokalune alosaripyengo e 17-to oktobresko 2021. Ayekha, lideri e LPRK-esko, Erjan Galushi, kedingya dizunen e thanipyengo Ortakoll thay Yenimahala, kote akalea phiravgya te ulavel e dizunencar olengo politikuno programi.

“Arat kedisalem akate vash te ulava tumencar amaro politikuno programi. Oven saste kay ulavgyen tumaro vahti vash te oven kotor e akale kedipasko thay te shunen amender, vi amen ta shuna tumencar tumare mangipya. Vash ake 6 masekuni buti, ano parlamentaruno niveli, amen reslam kay te inkuadrina e romani qhib ani Ministria vash e Kultura, Terne thay Sporti, konkretipea ani olengi web qham, so akava sine vi yekh kotar amaro lafideipe ano parlamentarune alosaripya, thay akava reslam. Duyto, reslem te putara ofise e partiako, so ake 20 bersh, e naklo poltikuno subyekti na therga ayekha diso. Na numay ofisi, numay ni yekh kompyuteri kote shay kerna sine buti. Numay, amari buti si transparentuni thay o sah o bukya dikhena vi tumen siton ulavde ano dosye vay folderya. So, akana vash lokalune alosaripya, manga vi tumendar te oven amenge phiko so me akaleske na sima undripe, vash te phikodeinen amare terne kandidaten vash asambleistya ano Prizrenoski Komuna, vash te shunyaren amaro avazo, thay te rijvidinen amari romani qhib thay historia prekal ofisialune droma. Akaleske mangaha tumaro avazo”, vakerga Galushi.

Ji kay, kandidati gendo 2 e partiako LPRK, Syleyman Elshani, ulavgya nesave suksesya e LPRK-esko thay rodingya e dizuendar ini phiko vash lokaluno alosaripya, konkretiepa te alosaren yekh romane asambleiste.

“Me sim but bahtalo kay sim kotor e LPRK-esko. Miri buti ji akana tumen dikhlen ano civiluno sektori, numay akana vi ano politiako. Vash hari maseka, yekhuni siyem partia kay reslem te organizina vaksinipe vash romenge ano Prizren, kote buderi desar 800 dizune reslem te vaksinirina ano ofisya e partiako, vi ano romane mahale. Akava ji akana niyekh na kergya, thay vash akaleske lelem vi komplimentya kotar e Sastipaski mnistria thay e fondaciya Yahyaga kay vi on rodinde te keren ayekha diso leindoy amende sar misay. Duyto, amen qaqipea vastina e romani qhib, thay sim bahtalo kay sitoy kotor e vastipasko ani Ministria e Kulturaki. Ji kay, bibahtake oy na sitoy kotor e Prizrenoska Komunako. Dava lafi tumenge, te sine kay avutno raipe ano Prizren na hraminla pe romani qhib ‘’Shukar Alen ano Prizren’’, me sim odova kova kokroro si te hraminav spreyea ano sah posterya e komunengno. Numay, rodava tumendar, kay vi tumen te den phiko amenge tumara vota, koya si but semni vash o romanipasko prezantipe ano Prizren. Votineni gendo 139 LPRK”, vakerga Syleyman Elshani, kandidati gendo 2 e LPRK-eska partiako.

Akava sine kedipe irati evovlirimo e dizunencar roma kotar o thanipya Ortakol thay Yenimahala, organizimo kotar o politikuno subyekti LPRK ano Prizren, vash o lokalune aloisaripya e 17 oktobresko 2021. O LPRK politikuno subyekti ano votipeksi lista vash komunaluni asambleya ani prizrenoski komuna adikerla o gendo 139.