HOHAVIPE

Kotar e mapa e qhinde lenyencar ji ko odova kay o Kurti penjargya e Kosova kay sitoy Srbia

  • 1 year ago
  • By Romtegra
Kosovako Sherunoministri Albin Kurti (Foto KoSSev)

Kay shrdsinde o butya vash laqharipe e pampureske dromesko Fushe Kosova- Mitrovica, thay kay adikerdili ceremonia kote lela kotor o kosovako sherunoministri, Albin Kurti, mashkar anglune raportinde prishtinake medie.
Vash o ovipe raportingya vi o portali Demokracia.com, vakerindoy kay anglo mothavipe e proyektesko kerdile “skandalozyuno bangipe“, vay kay ani ceremonia mothavdili e mapa ani koya e Kosova mothavdili sar kotor e Srbiako.
„Skandal – Kurti prezentinela proyekti e pampupreske dromesko e mapa e Kosovaki ano kotor e Srbiako (Foto)“, sito anav e nevipesko e protalesko kova hraminela kay vrdlodisyoriguni “samatreda, vay „samatreda e Kosovaki e Srbia“ mothavdili e qhinde lenyencar.
Nevipe akale portalesko cidingya e same e srbyune tabloidesko – Srbija Danas kova gelo bajako angle ano anav.
„KURTI KO AGOR PENJARGYA: KOSOVA SITOY SRBIA! Mapa mothavgya bihramimi holi ano hohavdi rashtra, vash sah bangarena e Albine“, raportingya akaya media vash shrdeipe e rekonstrukciako e pampureske dromesko Fushe Kosova – Mitrovica ano teksti kote identikune phiravgyola o vakeripya kotar Demokracia.com.
Ayekha e Srbija Danas informingya kay fotografia kotar akava ovipe kote dikhlola e mapa qhivgya o ofisi e kosovake sheruneminsitresko.
„Akava pampuresko drom ka rezultinel ano laqharipe e pampureske dromeske kapacitetesko, sar vash dromutne ayekha vi vash o malya, thay shukarne laqharipea e dromipeske vahtesko. Ka phirava may buderi, ka nakha may sig. Pampurya ano akava pamnpuresko drom ka phiren sigipeya kotar 80 ji po 120 kilometrya ani ora. Yekhune vasne. Akaya lenya ka kerel buti e tiknyaripeya e gazenge emisiengo  e jameska avlinyako thay uglen dioksidi. Ayekha vi, pampuresko drom sito shukar penjardo sar yeshil transporti“, vakergya o Kurti ano prezentipe akale proyektesko, ayekha hramingiya akaya media.
Beogradesko tabloidi ayekha vi phiravgya o teksti kotar Demokracia.com kote phengyola kay e Kosovaki mapa qhivgya vi e Phiravlin Korkorodecisipe, „numay ano tentipe te laqharel o bangipe pere lideresko“, ayekha kay ani akaya mapa na sine qhinde lenya.
Tekstya Demokracia.com thay Srbija Danas siton pashe identikune,  thay yekh kotar hari yaveripya sito kay yekh o Kurti hraminela sar sherunoministri e Kosova, a duyto sar „hohavdo sherunoministri e hohavde Raipesko “.
Ki yaver rig, yekh kotar may bare yaveripya dikhlola ano anav kote e Demokracia.com  hraminela „skandalu“, ji kay beogradesko tablodifi vakerla kay o „Kurti ko agor penjargya kay e Kosova sitoy Srbia “.
Anava akala mediako, mashkar yaver, na siton astardo ano teksti, kote nane mothavdilo sar o Kurti kegrya akava.
Mothavipya vash „penjaripe kay e Kosova sitoy Srbia“, ni o alava „Srbija“, na si ano vakeripe e kosovake sheruneministresko kotar akava ovipe, kole qhivgya olesko kabineti ano hramimo formati.
Kurti kotar yaver rig, mashkar yaver, anglopenjargya kay o agoripe e generaluna sanaciako akale pampureske dromesko ajukergyola 2024/2025.
 
Resursi: KoSSev