NEVIPE

Deputeti Galushi rodela godornipe kotar themeske institucie vash atako pe roma ano Prizren

  • 1 week ago
  • By Romtegra

Deputeti ano Kosovako Parlamenti thay lideri e partiako LPRK, Erxhan Galushi lela kotor ano RTK ani tema “Racako diskriminipe ani Kosova.

Angleder duy dive, konkretno pe data 21.11.2021 atakisali yekh familia ano yekh kinbikinipasko centro ‘Galeria’ kotar o Siguripeske butikerutne. Akale negativune aktoa Lenape buderi medie thay biraipkane organizacie, jikay may intensivno Lenape o politikune liderya e romane komuneteske.

Lideri e romane komunitetesko Erxhan Galushi, personaliteti kova may buderi vazdingya poro avazo ano akava ovipe lela kotor ano ververutne medie thay yekhatar lelape e suroa ano dive kana atakisale o romane familiake jene.

“Tentisalo te koshlol e yekhune jivdipaski tolerancia thay demokraciako thay thamidarinako rendo ano “sheruni diz e kulturake diversitetesko. Atakya e racistikune motivea musay te aqhon yekhatar kotar o institucionalune mekanizmya. Saday e suryengo profesionaluno tretiripe shrdipa e rodlaripaska procedura, medikalune ekzaminipya thay krisalinake decizie resna te vazdingyol e dizutnengo thay e instituciengo korkorojandipe.”, phenla o rayo Galushi mashkari piri oficialuni rafin ano facebook.

“Shashirisalum e sigurimyenge thay butikerutnenge tromalipeya. Sar shay on te len o krisi pere vaste thay te anen deciziya te maren yekh familia?!” sine yekh e konkludiendar kotar o deputeti Galushi ani Kosovaki Radio Televizia.

Ov ano RTK 3 mothavgya kay may angleder kana dikla o video kova ulo viraluno ano socialune rafinya shundilo qhelale, jikay kana lela kan kay odova familia si yekh romani familia, odoyaver sar reprezenti e romane komunitetesko decizingya kay sile moraluno obligipe te nakhel te dikhel thay te lel kan se so ulo e suroa.

“E momentestar kana informisalum, khetane e taloministrea Sejnur Veshall gelam ano policiako tordin thay rodingyem informacie phanglo e atakoske suroa. Palo akava yekhatar gelem te vizitina e familia koya sine traumyencar e akale atakostar.

Sheruno e partiako LPRK kerla kharipe te rashtrake organyenge te reaginen vash o leparno suro thay te roden godornipe kotar o relevantyune organya phando e suroske tretiripa, feri so saday agyar shay te evitingyol o qhelalipe.