NEVIPE

Adikergyola duyto beshipe vash e Romani qhib kotar e koalicia Ad Hoc

  • 1 month ago
  • By Romtegra

BRO “Nevo Koncepti”, adive pe data 25.to augusti 2022, ano City Hotel, realizingya o duyto maladipe e CAO-nga Ad Hoc Rafina vash o statute e Romana Qhibyako, ano kuadri e proyektesko “Promovipe e diversitetesko thay e romana qhibyako ani Prizrenoski Komuna”, phikoimo kotar e Evropako Koncili.

Koordinatori e proyektesko, Fatmir Menekshe, raportingya o aktivitetya kola realizisale ji avdive ano anav e akale proyektesko, sar si: hramipe e dokumentesko kotar o Krisyengo Eksperti, r. Naim Cahani vash o krisesko bazamenti kova argumentinla o shayipe kay e romani qhib te penjargyol ano oficialuno vastipe ani Prizrenoski Komuna, biqhalipe e rodlarinako kote qhivde hrami 10 romane intelektualya, biqhalipe e rodlarinako kote hraminla so manglola kotar e Prizrenoski Komuna, amalimi e dokumenteya e titula “O sfide vash e deciziya vash e romani qhiv sar qhib ano oficialuno vastipe kotar e Prizrenoski Komuna”, kote qhivde po hrami 12 terne intelektualya/aktivistya, realizipe e TV emisiako ani TV Prizreni kote prezantisalo o proyekti, rodlarin thay o upreleparno dokumenti, duy maladipya e institucincar sar Ofisi vash o Komunitetya, respektivitetea e godideutnencar:e Ministria vash administripe thay lokaluno thagaripe/raipe.

Mashkaro buderi diskucie, e Rafin Ad Hoc si te angazhingyol kay vi on, te hraminen yekh rodlarin, koya mothavla kay akaya rodlarin na si saday e romane komuniteteski, numay e sah Prizrenoske dizutnengi vash te zorakerel e romane komuniteteski rodlarin.

Palo prezentipe, raportipe thay diskucie, Rafin Ad Hoc vash e Romana Qhibyako statute ulavgya bukya mashkar peste vash sakova kotorleutno, bukya kola si te oven avutne aktivitetya e akale proyekteske.

Ano avutno kurko, ajukegyola kay te biqhalgyol vi o trinto rodlarin kotar o Rafin thay te realizingyol yekh medialuna konferencia vash te informingyol thay mobilizingyol o komuniteti vash o aktivitetya thay rezultatya e akala proyektesko kova riaktualizinela o pashe 15 bershuno rodlarin e romane komunitetesko koya vakerla romane tradicionalno ani akaya multikulturuni komuna.